Luk 8:40-56 | YomNWM | STEP | Bu kavutuka, nkangu wu batu wuyakula Yesu bila batu boso baba kumvingila.

Luke 8:40-56

Yesu wuviatuka bimbevo ayi lufua mu ngolo

(Matayi 9.18-26 ; Malako 5.21-43)

40 Bu kavutuka, nkangu wu batu wuyakula Yesu bila batu boso baba kumvingila. 41 Tala mutu wumosi dizina diandi Yayilusi ^{▼▼Minsekudi minkaka misonika Yayilo va buangu ki Yayilusi. Tala Malako 5.22.}. Niandi wuba pfumu yi nzo yi lukutukunu, wuyiza ayi wubua va malu ma Yesu, wunleba mu diambu kiza ku nzo andi 42 bila muanꞌandi wumosi kaka wunketo, wuba nduka-nduka kumi mimvu miodi wuba nduka mu fua. Bu kaba kuenda vayi nkangu wu batu wumfietikisa.

43 Nketo wumosi wuba kimbevo kiviokanga menga ; kumi mimvu miodi kabedila kimbevo beni ayi wumana fukisa bima biandi bioso kuidi minganga ^{▼▼Wumana fukisa bima biandi bioso mu diambu di futa minganga : mambu mama masi ko mu minkanda minkaka.}. Vayi kadi munganga wumosi kasia nunga ko mu kumbelusa. 44 Wufikama ku manima ma Yesu ayi wusimba tsongi nledi andi. Vana vawu menga makangama.

45 Buna Yesu wuyuvula :

—Nani wutsimbidi. Baboso bamanga kuawu kikinina. Diawu Piela kankambila va kimosi ayi bobo baba yandi : A Nlongi, nkangu wu batu wuzungididi ayi wufietikisidi ku zindambu zioso.

46 Vayi niandi wuvutula :

—Mutu wumosi wutsimbidi bila nzebi ti lulendo lutotukidi mu munu.

47 Nketo beni bu kamona ti kalendi suama ko, buna, wuyiza ayi lunkuku, wufukama va malu ma Yesu. Wusudikisa va ntuala wu batu boso bila kiokikansimbila ayi buevi kabelukididi.

48 Yesu wunkamba :

—A muanꞌama wunketo, minu kiaku kivukisidi, yenda mu ndembama.

49 Buna kamanisini ko tuba, mutu wuba kuidi pfumu nzo yilukutukunu wuyiza ayi wunkamba :

—Muanꞌaku wunketo fuidi, bika buela yamisa nlongi.

50 Yesu bu kawa bobo, wukamba Yayilusi ti :

—Bika mona boma vayi wilukila kaka bila muanꞌaku wunketo wela beluka.

51 Bu katula ku nzo, wukandika batu boso babika kota mu nzobotula kaka Piela, Yowani, Zaki ayi dise ayi ngudi yi muana ndumba. 52 Batu boso badila ayi banionga mu diambu diandi ayi wuba kamba :

—Bikanu dila bila kadi fua ko, tulu tuandi kalekidi.

53 Batu baba kunsekinina bila bazabati fuidi. 54 Buna Yesu wusimba koko ku muana ndumba ayi wutuba mu mbembo yingolo :

—Muanꞌama, telama kuaku.

55 Buna wufuluka ayi wutelama ; Yesu wuvana minsua mu diambu bamvana bidia. 56 Zimbuta zi muana ndumba zisimina. Yesu wuba kandika babika kambakadi kuidi mutu wumosi mambu maviokidi.